٦ أخطاء متعملهاش لو انت أنيميتور جديد
لو فاكر إن التوتر هو اصعب جزء في حياه أي أنيميتور جديد، فأحب أقولك إنك صح، بس في حاجة تانية لازم تاخد بالك منها، وهى تصرفاتك كأنيميتور، لأن جزء كبير من نجاح الأنيميتور بيعتمد وبشكل أساسي على طريقته في الشغل، وإزاي بيدير شغله بطريقة فعالة وذكية، في المقال دة هنتعرف سوا على ٦ أخطاء مينفعش تعملها وأنت أنيميتور جديد.
1- متستعجلش
هنا الحقيقة في مدرستين مشهورين، في مدرسة بتقولك إهتم بالكمية أكتر من الجودة، ومدرسة بتقولك لا لو مش هتبقى سريع وشغلك وممتاز متبقاش سريع وشغلك مقبول
وعلى فكرة الاتنين صح، بس أنت كأنيميتور جديد عينين المقيمين ليك هتركز أكتر علي الجودة مش الكمية، لأن سرعة الإنتاج مهارة بتيجي مع الوقت ومع زيادة تطبيقك لشغلك، لكن الجودة محتاجة وقت ومصاريف أكبر في تحسينها، فانت كأنيميتور جديد، إهتم بالجودة أكتر من الكمية، لحد ما تبقى قادر كفاية توازن بين جودة شغلك وكميته
٢- متاخدش النقد على محمل شخصي
حاول متكونش دفاعي دايماً، ومتاخد النقد على اعصابك، مش معنى إن حد نقد شغلك إنه نقدك أنت، بالعكس أشكره على النقد وابدأ حلل الرأي ده، وشوف فعلاً النقد دة صحيح ولا لا.
٣- متضيعش وقت
متشغلش نفسك وأنت بتشتغل بمواقع التواصل الاجتماعي، او بأي مصدر ممكن يشتتك عن شغلك، لأن المشتت بينتج ٢٠٪ من إنتاجه الحقيقي، عشان كدة التشتت اثناء العمل من أكتر الأخطاء اللي بتضر بأي أنيميتور جديد.
Dreamworks Animation
٤- متطلبش شغل اكبر
متشتكيش ان المخرج بيديك شغل صغير أو تفتكر أنك تستحق تحرك لقطات كبيرة ومهمة، لأن ببساطة لو المخرج شايف انك مستعد تعمل كدة كان هيقولك تعمل كدة، فمتحطش نفسك في صورة سلبية عند المخرج، واللي ممكن سمعتك تتأثر بيها داخل الصناعة.
٥- متشتكيش كتير، ومتبقاش سلبي
طبيعي في بيئة العمل تواجه شخصيات مزعجة كتير، وشخصيات هتشكلك تحديات ومشاكل لشغلك وراحتك، فاللحظة اللي تحس بيها بكدة، واجه بشجاعة ومتشتكيش، المديرين بطبعهم مبيحبوش الموظف اللي بيشتكي كتير،
6- متتكلمش كتير
ودة مش تقييد لحريتك ولا حاجة بالعكس، الخطوة دي هتخليك تتمتع بهدوء أكبر في إدارة شغلك، وخصوصاً انك لسة متعرفش بيئة الشركة، ونفسيات وأفكار الأفراد الموجودين فيها، عشان كدة لو محدش طلب منك رأيك متقولوش، لأن وأنت أنيميتور جديد بتبقى في أسفل الهرم الغذائي للشركة، وسهل جداً حد ييجي وياخد مكانك عشان كلمة طلعت منك بالغلط، فأحسبها كويس قبل ما تتكلم يا فنان، وخلى شغلك اللي يتكلم عنك، على الاقل لحد ما تفهم كل حاجة حواليك
في النهاية يا فنان، كل أنيميتور وليه طريقة شغله اللي نجحته واللي مؤمن بيها، بس المهم يبقى واعي بيها، وعارف امتى يغير فيها، وامتى يغيرها كلها.
